Kɛ' ‑blaa 'de ‑gbaʋn 'a ‑tɩ' 'ʋn ɛ
12
Nyɔsoa 'wlu 'de Moisɩ ‑pee, kɛ 'da ka: 2 ‑ɩn ‑wlu 'de Israɛ -nyʋ ‑pee ‑ɩn ‑na: ‑Bo 'nynɔkpao ‑gbaan 'de ʋ 'wlʋ "junmɔuju ɛ, ʋ se i ‑kwɛ mamaʋ 'sʋ, 'de 'wɩ ‑mɛ" 'sɔn 'di, ka ‑bo ʋ to kwa "jɛi ɛ. 3 'Wɩ 'a ‑mɛ" na ‑nɛ "kpei ɛ, nyɔ ɔ jreɛ "ju ‑saan" bʋɩ. 4 Ʋa muɛ 'wɩ 'a kwla taan 'jɔ taan kpan o poa', ‑wɛe ʋ 'je 'pepe nɩ, 'de nmɔɔ' -wlʋa ʋ 'ʋn ʋa' -gbaan "nɔ ɔ' ‑tɩ' 'ʋn, ʋ se dɛ ‑teea kpɔi" jrɛ' "i blai, ʋ se 'e Nyɔsoa 'a ‑gbɛɛna' mu i mamaʋ 'sʋ nɔ" ‑ɛɛ di ʋ 'jea i ‑kwɛ 'jee nyni. 5 ‑Bo ʋ 'wlʋ 'nynɔkpaoju-, ʋ se i ‑kwɛ i 'de 'dɔɔ 'sɔɔn 'di, ka ‑bo ʋ to kwa "jɛi nɩa, ‑wɛe ʋ 'je 'wɩ 'a kwla ‑mɛɛo" 'jɔ ‑mɛɛo" fuo-, ‑wɛe ʋ 'je i ‑kwɛ 'de nmɔ ‑wlʋa 'de ʋ 'ʋn ʋa' -gbaan "nɔ 'a ‑tɩ' 'ʋn. 6 ‑Bo ʋa' 'pepe nɩa' 'a 'wɩ "sii "i ɛ, ‑bo ɛ nɩ "junmɔuju o, ‑bo ɛ nɩ 'nynɔkpaoju o, ʋa muɛ 'de -tan 'tan ‑ɛ ‑sɔn nyʋ ke Kea 'a ‑gbʋʋn' a "i 'a paa na' 'blae ‑ɛ ‑nɩa ɛɛ' "i ‑sa ‑sʋn 'di jaa', ɛ 'je 'sraa ɛ ‑wee' nɛ dia nʋ, ‑bo ɛ se "pau nɩɛ -mɛ ‑gbɛɛ mɛ ʋ 'je ja-, ‑wɛe ɩ 'je ʋa dɛsaʋn 'a -kwɛa 'a 'sraadɛ nɩ, ɩmɩ ʋ 'je 'sraa ‑sai "nyɩ. 7 Ɔmɔ ‑ɔɔ mu ɩ 'sraa ‑saa', 'de Nyɔsoa "juɛi ‑wɛe ɔmɔ ‑je ka nyɔ ɔ nʋa -wɛe nyɔ ɔ -kwɛa i ɔ 'jeɛ nʋ 'de 'nynɔkpao -nʋ "kpei 'sʋ ʋ nɩɛ 'pepe 'de nmɔ ‑wlʋa 'de ʋ 'ʋn ʋa' -gbaan "nɔ ɔ' ‑tɩ' 'ʋn. 'Kamɔ kɛ' ‑blaa 'de 'nynɔkpao -ʋ -wlʋa "junmɔuju 'dewlɛ -ʋ -wlʋa 'nynɔkpaoju 'a ‑tɩ' 'ʋn nɩ-. 8 ‑Bo ʋ se 'blae 'jea 'bɛɛ, ‑bo ɛ se "pau 'sɔɔn nɩɛ -mɛ -gbɛɛ 'sɔɔn mɛ ʋ 'je ja-, ‑bo due' nʋ 'sraadɛ ‑ɛ ‑wee' nɛ di 'a, ‑wɛe due' 'je dɛsaʋn 'a -kwɛa 'a 'sraadɛ nʋ, 'sraa ‑sai a muɛ ka nyɔ ɔ, nʋa ‑wɛe nyɔ 'ɔ dɛsaʋn 'a ‑kwɛa', ɔɔ muɛ nʋa' 'de ʋʋa' ‑tɩ' 'ʋn, ‑wɛe ʋ 'je i ‑kwɛ.